PuntoGal, a entidade xestora do dominio identificador de Galicia na rede, amosa a súa fonda preocupación polo bloqueo de LaLiga a enderezos IP de webs durante a retransmisión de partidos de fútbol, o que podería afectar a páxinas con dominio .GAL que non están realizando actividade ilegal algunha. LaLiga, amparándose na sentenza xudicial que lle permite impedir a emisión de eventos deportivos sen permiso, está invalidando durante o proceso o acceso a sitios lexítimos, o que constitúe un ataque sen precedentes aos dereitos dixitais da cidadanía. Estas accións poderían afectar, nun primeiro cálculo, a arredor de cen sitios con dominio .GAL.

PuntoGal monitorizará o impacto destes bloqueos en páxinas con dominio .GAL. Nese sentido, pon á disposición dos usuarios o correo electrónico info@dominio.gal para que estes tamén poidan achegar información sobre a afectación das súas páxinas. Igualmente, o dominio xa forma parte dun equipo de traballo creado ao respecto e do que forman parte as entidades xestoras de .EUS e .CAT..