Os retos e ameazas dos contidos en galego no marco das buscas en Google, e, en xeral, na rede, centraron este domingo a xornada profesional organizada por PuntoGal, a entidade que xestiona o dominio galego na internet, na terceira e derradeira xornada da XVI edición do Culturgal, que se desenvolve esta fin de semana en Pontevedra. Participaron voces especialistas como son o consultor SEO e experto en estratexia dixital Saúl Vérez, a xornalista especializada en márketing de contidos e comunicación corporativa, responsable de comunicación de Dinahosting, Adriana Freire, e o profesor de comunicación dixital da Universidade de Vigo Xabier Martínez Rolán, baixo a moderación da xornalista especializada en comunicación, márketing e estratexia dixital Bárbara G. Vilariño. 

Coa falta de recoñecemento da lingua galega por parte de Google e outras plataformas como punto de partida, as e os expertos apuntaron distintas estratexias para reforzar o galego dentro e fóra de internet. Así, Xabier Martínez Rolán indicou que a Intelixencia Artificial é “o derradeiro tren que temos para salvar o galego” neste ámbito, tendo en conta que as empresas detrás destes modelos de linguaxe priman aquelas linguas que máis se falan. “Estamos nun momento importante, debemos atopar un modelo que permita unha comunicación eficiente en galego”, apostou. 

Contra a idea de que, a nivel empresarial, identificarse co galego “pecha o mercado”, Saúl Vérez aludiu á “proximidade” do público obxectivo, no caso de moitas áreas de negocio e chamou ás administracións públicas a “facer un esforzo” para promover, “todos a unha”,  o comercio local e a boa praxe en internet, con estratexias como selos identificativos de calidade polo emprego do galego.  Pola súa banda, Adriana Freire salientou a “rendibilidade” que ten o uso empresarial da lingua. “Todo o que sexa recuperar a proximidade co público é unha fortaleza. O galego é un selo e símbolo de prestixio para a nosa marca, e por iso é rendible”, observou.

Ao longo da sesión abordouse tamén o papel que teñen as institucións e administracións, por contar cos recursos e a capacidade de presión para promover o galego na rede, pero tamén das empresas, a través das súas prácticas ou mediante a colaboración co sector público, e das personas usuarias, a nivel individual, para reforzar a lingua propia no ámbito da internet e a tecnoloxía. Tamén se aludiu á creación cultural galega, e en concreto a dos sectores máis novos, que moitas veces non conta cos altofalantes necesarios para achegar contidos novos e transversais en galego a públicos más amplos.