Cada vez facemos máis cousas na web, e cada vez máis complicadas. Por iso, cando temos ferramentas que nos fan a vida un pouco máis sinxela, agradecémolas de verdade.

En PuntoGal, traballando con Dinahosting, un dos noso rexistradores, temos un par de trebellos que vos poden axudar no traballo da rede. Son doadas de usar, non andan dando voltas ou abrindo fiestras que non son necesarias e están libres de publicidade, así que tamén se poden usar en contextos profesionais sen temor a meter a pata.
En primeiro lugar temos un acurtador de direccións web. So temos que coller unha desas que non colle en ningún sitio porque se estende por centos de caracteres e ir a i.gal.

Aí poderemos elixir a dirección que prefiramos e ademais poderemos facer un seguimento da cantidade de veces que se visitou, administrala e mesmo borrala cando prefiramos que desapareza.
Cada vez nos pasa máis: temos arquivos que queremos compartir pero non nos collen no correo. Fotos, filmacións, arquivos de son, arquivos do traballo ou cousas para clase. E como cada vez teletraballamos máis, non sempre temos a rede da empresa ou da escola accesible desde o sitio no que estamos. Para eses casos, e para envíar arquivos de ata 3GB e que se recollan ata dúas semanas máis tarde, o mellor e usar velaqui.gal. Probádeo e veredes.

En PuntoGal seguimos pensando en ferramentas para axudarvos co voso traballo. Se tedes calquera idea, non tes máis que contala a info@dominio.gal.