Unha das cousas que queremos ver en PuntoGal é como todos os concellos de Galicia usan un dominio noso para ofrecer información e servizos a todos os seus veciños e tamén aos seus visitantes.

Para iso, desde o primeiro momento reservamos os nomes posibles de todos os concellos (si, para os 313, e tendo en conta varias posibilidades). A meirande parte deles xa o están usando, arredor de 200, como seguramente xa sabedes. E hai moitos que usan máis de un, porque teñen festas, festivais, eventos ou concellarías moi activas e que precisan dun espazo propio na web.

Para os que aínda non o usan, de vez en cando facemos un recordatorio. Para isto traballamos coa FEGAMP, que é unha entidade pioneira no uso do .gal, e coa que colaboramos todos os anos. Desta vez publicamos na súa revista unha páxina de banda deseñada para lembrarlle aos concellos que non tiveron tempo de poñer o dominio en marcha que estamos aquí para o que precisen.

O cómic debuxouno Martín Romero, un dos ilustradores e creadores de BD máis activos do panorama galego, que o mesmo edita libros para nenos que páxinas en Le Monde Diplomatique.