A ASOCIACIÓN PRESENTA NA CORUÑA OS PROGRAMAS ABRENTE E CARREIRA, QUE XA ESTÁN ACTIVOS

 Os dominios .gal pódense solicitar dende este martes dentro dunha nova Fase de Lanzamento deseñada para grupos con dereitos preferentes como, por exemplo, as entidades que promoven o galego, administracións públicas, propietarios de marcas etc.. A Asociación puntoGAL presentou as súas características e prezos base hoxe ao mediodía na sede da Real Academia Galega (RAG) na Coruña.
Cinco categorías de prioridades no Abrente  A Fase de Lanzamento está formada pola posta en marcha dos programas Abrente e Carreira. A directora xeral de puntoGAL, Edita de Lorenzo, explicou que dentro do Abrente, pódense solicitar dominos dentro de cinco categorías:1.- Marcas validadas na Trademark Clearing House (TMCH), unha base de datos de marcas internacionais establecida por ICANN, o organismo que goberna as direccións da Internet. 2.- Marcas do TMCH que non cumpren cos requisitos para usar un .gal, pero queren asegurarse de que a súa marca non sexa rexistrada, aínda que non activen inicialmente a súa páxina baixo os requirimentos de dominio .gal. 3.- Administracións públicas de calquera ámbito con competencia en Galicia e entidades de promoción da cultura e da lingua galegas. Institucións e entidades (consorcios, axencias, comisións, fundacións, asociacións etc.) poderán solicitar, entre outros, nomes xeográficos con relevancia, os propios nomes das entidades, o dos seus servizos en liña e as súas marcas rexistradas. 4.- Marcas rexistradas a calquera nivel con validez en Galicia. Tamén as denominacións de orixe rexistradas. 5.- Calquera que  tivese ata agora unha web, un portal web etc, e veña promovendo a cultura galega e utilizando a lingua galega nas súas comunicacións en liña baixo outro dominio pode solicitar o seu propio nome ou o nome dos dominios rexistrados e usados. O prazo de todas as categorías do Abrente remata o 18 de novembro, salvo a categoría 3, que remata o 25 de novembro. No caso de se presentaren varias peticións para o mesmo dominio, terá preferencia o solicitante pertencente a unha categoría superior, tal e como obrigan as normas da ICANN. Máis barato para os que xa apoian o galego Os prezos base varían segudo a categoría. A Asociación puntoGAL fixo un esforzo para que poidan gozar dun prezo menor aqueles que promocionan a cultura galega e xa apoian o idioma empregando o galego na Rede e as institucións e entidades que teñen un papel na súa promoción.  Por iso as categorías 3 e 5 partirán dun prezo base aproximado de 50 euros por dominio por ano. Seguindo a mesma lóxica, no Abrente o prezo base máis alto, 170 euros, é para a categoría 2, as marcas que queren defender o seu dominio pero que non van contribuír á promoción do galego na Rede usando o .gal . As categorías 1 e 4 teñen un prezo intermedio, 65 euros. Con todo, o prezo final para o consumidor non o fixa puntoGAL, senón os rexistradores acreditados por ICANN, as empresas comercializadoras finais. Os prezos citados aquí son polo tanto prezos base e aproximados, cada rexistrador pode realizar libremente ofertas diferentes. A Asociación publicará unha lista de rexistradores acreditados na súa web, para que os interesados poidan escoller o rexistrador que máis lles conveña. Os interesados deberán indicar na súa solicitude a cal das categorias optan e motivar a súa clasificación, tendo en conta que as de maior rango terán prioridade sobre as de menos rango. Todas as peticións entrarán nun proceso de estudo  previo antes de poder activarse, polo que as solicitudes recibidas e aprobadas non será posible activalas normalmente antes do día 2 de decembro. Carreira aberta xa tamén para os que non teñen dereitos preferentes E que pasa con aqueles que queren rexistrar un .gal xa pero o dominio que lles interesa non cae en ningunha das categorías do Abrente? Tamén poden solicitar o dominio dende hoxe. Iso si, farano a través dun programa cun nome diferente, Carreira, e cun prezo base superior, 170 euros. Os que decidan participar na Carreira teñen as vantaxes de aspirar a facerse con calquera enderezo .gal (non é necesario que proben ter algún dereito preferente sobre esa dirección como os de Abrente) sen ter que agaradar ao 2 de decembro. Daquela será, cando se abrirá o último prazo, a Fase Aberta, un período sen restricións e cando se adxudicarán os dominios por orde de chegada da solicitude. González anima a aproveitar a oportunidade de rexistrar enderezos .gal Durante o acto de presentación, o presidente de Puntogal animou a todas as persoas e entidades que teñen algún dereito sobre o seu enderezo de Internet a aproveitar a oportunidade de rexistralo baixo o dominio .gal de xeito preferente. O Presidente, tamén membro da Real Academia Galega, Manuel González dixo que “estamos convencidos de que nestes próximos meses se sumarán todos os dominios da administración   autonómica, da administración periférica do Estado, de todos os sindicatos, de todos os Centros de Ensino, de todas as Academias, de todos os colexios   e asociacións profesionais, dunha parte importante das nosas empresas e comercios, das asociacións culturais de base, de todos os concellos de Galicia”. González e De Lorenzo tamén agradeceron á Real Academia Galega o apoio prestado no proceso de solicitude do dominio .gal, e a súa axuda na organización desta presentación, na que tamén participou Xesús Alonso Montero, presidente da RAG. PuntoGAL lanza agora estes novos períodos de solicitude tras completar con éxito o Programa Pioneiros. A maioría dos 93 enderezos pioneiros adxudicados na véspera do 25 de xullo xa está activo. A Asociación manifesta o seu agradecemento aos Pioneiros que activaron xa os seus enderezos, e anima a facelo aos que aínda non os activaron. Tamén indica que existe un número moi reducido de Pioneiros pendentes de activar por causas alleas á Asociación ou ao propios pioneiro, pois ICANN impuxo sobre eles certas salvagardas especiais sobre as que puntoGAL está a traballar para que se poidan levantar o antes posíbel. Grazas polo masivo e ininterrompido apoio recibido estes sete anos A Asociación puntoGAL está formada por 114 organizacións de todos os sectores sociais; incluídas as principais institucións culturais do país, as tres universidades, medios de comunicación, empresas de tecnoloxía, centros de galegos no exterior e ducias de asociacións culturais de base. Durante os seus oito anos de traballo continuado gañouse o apoio de máis de 12.000 persoas, apoio que foi fundamental para que ICANN aprobase a candidatura en 2013 e delegase o dominio esta primavera. A todas estas persoas e institucións, puntoGAL quere darlles as grazas unha vez máis. O domino é voso.